Ij Brandé. Armanach ëd poesìa piemontèisa 2008

An fa piasì ancaminé 'l 2008 con la segnalassion d'armanach e 'd lìber an piemontèis, ch'a marco bin për la vivacità 'd nòsta lenga e nòsta coltura. E a l'é d'òbligh, «noblesse oblige!» ancaminé con «Ij Brandé. Armanach ëd poesìa piemontèisa 2008», armanach literari 'd Pinin Pacòt ch'a continua a seurte coma suplement al mensil «Piemontèis ancheuj», soagnà për 'l 2008 da Remo Bertodatti, Giuseppe Goria, Michele Bonavero e Dario Pasero, l'ampostassion gràfica 'd Corrado Marra, ij disegn ant ij test 'd Mario Galin-a (Piemonte in Bancarella, pp.90, ?10). A s'ancamin-a, coma tradission con ël calendari piemontèis, ij segn dël zodìo, ël proverbi dël mèis (prim: Gené pòver d'eva a fa 'l paisan rich), ij Sant piemontèis e peui via a la leteratura, con n'inédit ëd Dumini Badalin e un Tavio Còsio; poesìe 'd Barba Tòni, 'd Silverio Luis Cismondi, 'd Bep Ross, e dij poeta d'ancheuj, Dario Pasero, Pinuccia Gamba, Gioann Morel, Mapi, Michel dij Bonavé, Nico Vinèis, Silvio Viberti, Elisa Revelli Tomatis, Carlo Dardanello, Tòni Tavela, Tavo Burat; pròse 'd Censin Pich, Cichin Paschëtta, Santacros ëd Civass, Camillo Brero e d'àutri ancora. Un bochèt për ancaminé bin l'an.
A fa 31 ani «'l tò Almanach», publicà a Coni da Primalpe. Fondà da Costanzo Martini, a seurt soagnà da Guido Musso, con na cuvertin-a 'd Candida Rabbia ch'a firma 'dcò la poesìa d'overtura: «nòsta corenta,/sto balèt anvisch/ ëd na vòlta!/ Vej e giovo a lo baio anse-ma....// Noi i foma 'ncò na vi­ra./ noi giroma 'ncò na vòl­ta../ e doman.. sarà n'àut dì ». E sitoma coma bon ancaminament piemontèis, pen-a rivà su nòst tàulin, costi lìber ch'a fan gòj: Adriana Chiabrando, «Seeet!», stòrie 'd masche e nen mach (Turin, Gioventura piemontèisa, pp. 103, ?15). Teresio Malpassuto, «Lader da stèlji», presentassion ëd Gianni Abbate, testimoniansa 'd Giorgio Barberi Squarciti (Centro Studi Don Minzoni-Ca dë Studi Pinin Pacòt, pp. 99). «Tra ij brich e 'l Pò», la cusin-a d'un temp d'antan, soagnà da Marisa e Manuel Torello (Colegn. Gruppo Archeologico Ad Quintum).
Bon 2008 a tuti!

d'Albina Malerba - dal Vënner ëd La Stampa dl'11 ëd gené 2008