Fòto, feste, ideje, bochèt ëd pròse e poesìe mëssonà d'ocasion për Natal e l'agn neuv

Quand i s'avsinoma a le feste për ij lìber as presenta sempe un moment bon: le giojere për boneur, dacant ai tìtol «da regal», as argioisso 'dcò 'd tante bele euvre an piemontèis. I na smonoma ambelessì na mëssonà, an avisand che peui a mancherà nen l'ocasion ëd parlene ant le sman-e ch'a vniran. An fa piasì ancaminé da «Ij Brandé. Armanach ëd poesìa piemontèisa 2006», soagnà da Remo Bertodatti, con la colaborassion ëd Michele Bonavero e Giusep Goria, achit ëd Camillo Brero (n. 47, A l'Ansëgna dij Brandé, suplement anual ëd «Piemontèis ancheuj», Turin, pp.144): con na sernìa 'd pròse e 'd poesìe an piemontèis d'ancheuj, ch'an dan na bela ideja dla vitalità 'd nòsta leteratura. Ancora a l'Ansëgna dij Brandé, publicà da Il Punto-Piemonte in Bancarella, l'«Agenda Piemontèisa 2006», soagnà da Giusep Gorìa, con dissegn ëd Mario Pich, Nicola Morello e Franchin Gonella: n'agenda vera, con tut lë spassio për scrive ij randevò, j'angage, ma compagnà di për di con poesìe an piemontèis, për passé n'ani anter ansema ai nòsti poeta.
Publicà da Omega Edission ëd Turin, un gran bel travaj 'd Tiziana Mo, «Le parole della memoria. Il calendario rituale contadino tra Roero e Astigiano», con n'introdussion ëd Piercarlo Grimaldi (pp. 285) e bele fòto d'antan: travers le paròle dij vej, ij travaj, le feste, la vita, la mòrt ch'as dësdavan-o dapress a le stagion. Pier Natale Guerci, pròpe pòch prima d'andesne a l'improvis, a l'ha fane cadò dla sconda edission ëd soe conte, stòrie, poesìe «Ij nòno a leso, j'anvod a scoto» (Pinareul, Alzani, pp. 126): lo ricordoma con afession. Ancora un lìber delissios ëd Federica Scalafiotti, a l'é la racòlta dle «Fàule piemontèise» 'd Giuseppe Arnàud, scritor dl'Eutsent ëd Moncalé, soagnà da Carlo Comòli e Robert Jean-Michel Nové për le edission ëd Gioventura Piemontèisa (pp. 143). E, pen-a surtì, për La Slòira d'Ivreja, un bochèt ëd poesìe 'd Silvio Viberti, «Langa, mia patria cita», achit ëd Dario Pasero, ilustrassion ëd Giovanni Gagino (pp.46).

d'Albina Malerba - dal Vënner dla Stampa dël 9 dë Dzèmber dël 2005