Armanach 2007

A sarà përchè i soma 'd bogianen ëd coj 'd marca franca, ma a venta dì che combin ij temp a sìo màire për l'editorìa an géner, a son sempe tanti ij lìber an piemontèis ch'a ven-o publicà (magare un pòch arangiandse) bele sensa jë dné ch'a calo ant ij borgiachin dj'àutre lenghe cite (cole ch'a l'han avù un sant an paradis e a son drinta la lege nassional tant për capisse). Pròse, poesìe, sonèt, calendari, ch'a traverso la tère 'd Piemont con nòste bele paròle. E varda sì na prima mëssonà 'd tìtoj. Ij prim a bogesse e a felo con tanta gòj ch'a sa amusene e fin-a mostene, a son ij cit e se soma pen-a al prinsipi dl'oton i l'oma già sla tàula doi Armanach për ël 2007, tuti e doi soagnà dai cit dle scòle. Un a l'é 'd Gioventura Piemontèisa che con la Classe 5C dla Scòla Elementar Statal "A. Vivaldi" 'd Seto, mersì a l'angage dle magistre Adriana Chiabrando e Stefania Penzin, ant ël proget "Arbut. Ël piemontèis a scòla", a l'han realisà l'Armanach 2007 con për minca mèis un disegn pien ëd color e d'argioissansa e un tìtol ch'a identìfica 'l mèis.
A s'antitola anvece "Ël nòstr Calendari 2007", col soagnà da la classe 4° dla Scòla Primaria 'd Sant'Anna Avagnina dël Mondvì, mersì a 'd magistre ch'a l'han angagiasse ant ël Cors ëd piemontèis tnù da Nicola Duberti për la Region Piemont e la Ca dë Studi Piemontèis. Con 'd disegn ch'a toca 'l cheur për soa gënita espression i trovoma proverbi, manere 'd dì, andvinaje e tut lòn ch'a fa "calendari" dla tradission.

d'Albina Malerba - dal Vënner dLa Stampa dël 27 d'Otóber dël 2006