L'iscrission Séltica ëd San Bërnardin ëd Briòna, a 55 Km. da Lugan, a l'é stàita trovà ant ël 1859.
Adess a l'é ant ël museo 'd Novara. Ël test, scrivù an alfabèt Lepòntich, a l'é:
TANOTALIKNOI KVITOS LEKATOS ANOKOPOKIOS SETVPOKIOS ESANEKOTI ANAREVIŚEOS TANOTALOS KARNITVS
"(Ij 3 fij) 'd Dannotalos, Quintos, Andokombogios Legatos, Setupokios (e 'l fij) 'd Esandekotos, ël
savant Dannotalos, a l'han butà"
Vëddoma l'iscrission paròla për paròla:
TANOTALIKNOI: a l'é nominativ plural scomponìbil an Danno-tal-ikn-o-i (= ij fij 'd Dannotalos). Da noté che "-ikno" a
ìndica patronìmic (plural "-iknoi").
KVITOS: a sta për "Quintos" (o "Quintus"), nòm pròpi maschil, e a l'é drocaje la nasal dnans a la dental "t".
LEKATOS: a sta për "legatos" (o "legatus"), la càrica d'un dij tre fij.
ANOKOPOKIOS: a l'é ël nòm ëd n'àutr dij fij e a l'é scomponìbil an Ande-kom-bog-jo-s (nòm con ël significà
ëd soldà): "Ande" e "kom" a son raforsativ; "bog" a veul dì soldà (cfr. irlandèis "bongid" = rompe, vince).
SETVPOKIOS: a l'é 'l nòm d'un tèrs fij e a veul dì "ch'as deurb na stra" (coma a ìndica l'element "sentu-", stra,
cfr. irlandèis "set", gàlich "sentu", galèis "hynt"),
ESANEKOTI: a l'é genitiv singolar ëd nòm e a sta për "i fij 'd Esandekoto" (andova "kotos" = vej).
ANAREVIŚEOS: a veul dì tant savant e as peul scompon-e an Ande-are-wid-tojo-s: "Ande-" (dova a l'é docaje la nasal) a
l'é un raforsativ, "wid" a sta për "a sa".
TANOTALOS: ël nòm pròpi maschil Dannotalos a l'é scomponìbil an "danno" (= giùdice) e "talos" (=front).
KARNITVS: a l'è 'l përfet ëd verb plural e a sta për "a l'han butà"; as arconoss "kar-", baron ëd pere.
Second cheicun la fin an "-s" a l'é spiegà përché as riferiss a 'd nòm pluraj; second ëd j'àutri la fin an "-us" a
ìndica ël pronòm për ël complement ogèt ("a l'han butala").